Pipali Dham | પાટડી પાસે આવેલા ઐતિહાસિક પીપળીધામ મંદિરના મહંત પ.પૂ. ભક્તરાજ વાસુદેવ મહારાજને શ્રેષ્ઠતમ પદ મળવા બદલ ભવ્ય પદ અભિષેક સમારોહનું આયોજન કરવામાં આવ્યું છે.
પીપળીધામમાં છેલ્લા 100 વર્ષથી પણ વધુ સમયથી સવારામબાપા પરિવાર દ્વારા અવિરતપણે સદાવ્રત ચલાવવામાં આવે છે.
આ ઈતિહાસમાં પ્રથમવાર બનશે જ્યારે વિવિધ અખાડાના સાધુ-સંતો પીપળીધામ પધારીને વાસુદેવ મહારાજને પદ અભિષેક સન્માન આપશે.
આ ધાર્મિક મહોત્સવમાં ભાગ લેવા માટે આગામી 21મી તારીખે લાખો ભક્તો પીપળીધામ ખાતે ઉમટી પડશે.
આ ભવ્ય પદ અભિષેક સમારોહ પ.પૂ. શેષમઠ પશ્ચિમ પીઠાધીશ્વર જગતગુરુ રામાનંદાચાર્યજીના અધ્યક્ષ સ્થાને યોજાશે.
આ પ્રસંગે માધવાચાર્યજી મહારાજ, અખિલ ભારતીય અખાડા પરિષદના મહામંત્રી રાજેન્દ્રદાસજી મહારાજ, સારસા પીઠના જગતગુરુ અવિચલ દેવાચાર્યજી મહારાજ, અયોધ્યાના રામજન્મભૂમિ ટ્રસ્ટના સંતો, મોહનદાસજી મહારાજ અને અમદાવાદ જગન્નાથ મંદિરના મહંત સહિત દેશભરના વિવિધ અખાડાના શ્રેષ્ઠ સંતો પોતાના હસ્તે પદ અભિષેક કરશે.
ગુજરાતના પ્રખ્યાત ધાર્મિક ધામો જેવા કે દુધરેજ વડવાળા ધામ, જૂનાગઢ ગોરક્ષનાથ, સત્તાધાર આપાગીગાની જગ્યા, જસદણ બાલાજીધામ, રામદેવરા, અને સોખડા સહિતના સંતો-મહંતો પણ આ પવિત્ર અવસરે વિશેષ ઉપસ્થિત રહેશે.
સુરેન્દ્રનગર, અમદાવાદ, રાજકોટ, જૂનાગઢ, કચ્છ અને ભાવનગર સહિત 20થી વધુ જિલ્લાઓમાંથી લાખો શ્રદ્ધાળુઓ આ સમારોહના સાક્ષી બનશે. તારીખ 20 અને 21 દરમિયાન ખ્યાતનામ કલાકારો દ્વારા ભવ્ય સંતવાણીનો કાર્યક્રમ પણ યોજાશે.
