ઝાલાવાડમાં 5,707 સ્માર્ટ મીટર કોમ્યુનિકેશન સિસ્ટમ કામ કરતી નથી, ગ્રાહકો પરેશાન

PGVCL Smart Meter | પશ્ચિમ ગુજરાત વીજ કંપની લિમિટેડ (પીજીવીસીએલ) હેઠળ સૌરાષ્ટ્ર-કચ્છમાં શરૂ કરાયેલી સ્માર્ટ મીટર યોજના ખાનગી કંપનીની નબળી કામગીરીના કારણે વિવાદમાં સપડાઈ છે.

ગુડગાંવની અપટાવા ખાનગી કંપનીને 10 વર્ષ માટે આપવામાં આવેલા રૂ. 1.37 લાખ કરોડના પ્રોજેક્ટમાં ટેકનોલોજી તકલાદી સાબિત થતાં ગ્રાહકો અને વીજ કર્મચારીઓ બંને મુશ્કેલીમાં મુકાયા છે.

સૌરાષ્ટ્ર-કચ્છના વિવિધ ડિવિઝનોમાં ક્ષતિગ્રસ્ત સ્માર્ટ મીટરના મામલે સુરેન્દ્રનગર ડિવિઝન સમગ્ર પ્રદેશમાં સૌથી આગળ નોંધાયું છે, જ્યાં સૌથી વધુ 5,707 સ્માર્ટ મીટરમાં કોમ્યુનિકેશન સિસ્ટમ કામ કરતી બંધ થઈ ગઈ છે.

સ્માર્ટ મીટરમાં કનેક્ટિવિટી ખોરવાઈ જતાં ગ્રાહકોના વીજ વપરાશની મીટર રીડિંગ સાયકલ ખોરવાઈ ગઈ છે. સમયસર બિલ જનરેટ ન થવાના કારણે ગ્રાહકોને બે-ત્રણ મહિનાના બિલ એકસાથે ભરવાનો વારો આવે છે, જેનાથી ગ્રાહકોમાં ભારે રોષ જોવા મળી રહ્યો છે.

બીજી બાજુ, સ્માર્ટ મીટર લગાડવાની ખાનગી કંપનીને જે કામગીરી સોંપવામાં આવી છે તેમાં સિંગલ ફેઈઝના 20,91,895, થ્રી ફેઈસના 2,28,041 સીટી ઓપરેટેડ 27,542 અને ટ્રાન્સફોર્મર ઉપર 1,09,130 મીટર લગાડવાનું કામ સોંપવામાં આવ્યું છે.

પરંતુ આ કામગીરી માટે સ્વતંત્ર કર્મચારીઓની નિયુક્તિ કરવામાં નહી આવી હોવાથી તમામ કામગીરી અત્યારે વીજ કર્મચારીઓએ કરવું પડે છે.  જેના કારણે ગ્રાહકો સાથે સીધા જ સંઘર્ષમાં આવવાનું થાય છે.

પરિણામે, કામના ડબલ ભારણ અને ગ્રાહકો સાથે સીધા સંઘર્ષની સ્થિતિ ઊભી થતાં સુરેન્દ્રનગર સબ-ડિવિઝનના ઈજનેરોમાં ખાનગી કંપની સામે ભારે અસંતોષ વ્યાપ્યો છે.

ઉચ્ચ અધિકારીઓ અને કંપનીનું ધ્યાન દોરવા છતાં છેલ્લા છ મહિનાથી ક્ષતિઓ સુધારવામાં આવી નથી. સમગ્ર સૌરાષ્ટ્ર-કચ્છમાં 35,085 મીટરમાંથી એકલા સુરેન્દ્રનગરમાં જ 5,707 મીટર શોભાના ગાંઠિયા સમાન બનતાં યોજનાની અસરકારકતા સામે ગંભીર પ્રશ્નાર્થ ઊભા થયા છે.

સૌરાષ્ટ્ર-કચ્છમાં વીજતંત્રના જૂદા-જૂદા ડિવિઝનમાં ક્ષતિગ્રસ્ત સ્માર્ટ મીટર

ક્રમ	ડિવિઝન	સંખ્યા
01	સુરેન્દ્રનગર	5,707
02	કચ્છ	4,946
03	રાજકોટ સીટી	4,61પ
04	ભાવનગર	4,008
05.	પોરબંદર	2,960
06.	રાજકોટ રૃરલ	2,257
07.	જામનગર	2,522
08.	અમરેલી	1,973
09.	મોરબી	1,791
10.	જૂનાગઢ	1736
11.	બોટાદ	1358
12.	અંજાર	1192
	કુલ	35,085