લીંબડીમાં પર્યુષણ પર્વ નિમિત્તે ભગવાન મહાવીર સ્વામીને આંગીનો શણગાર

Paryushan parv Limbdi | લીંબડી શહેરમાં જૈન ધર્મના પવિત્ર મહાપર્વ પર્યુષણની આરાધના અર્થે અનોખો ઉત્સાહ અને ભક્તિસભર માહોલ જોવા મળી રહ્યો છે.

પર્વના વિશેષ 8 દિવસો નિમિત્તે શહેરના વિવિધ જિનાલયોને શ્રદ્ધાળુઓ દ્વારા ભવ્યતાથી શણગારવામાં આવ્યા છે. ભગવાન મહાવીર સ્વામીના દર્શન માટે શ્રદ્ધાળુઓની ભારે ભીડ ઉમટી છે.

લીંબડી શહેરના બાહુજીન સ્વામી જિનાલય, નૂતન જિનાલય તથા બોડીંગ જિનાલય શાંતિનાથ દાદા સહિતના મુખ્ય જિનાલયોમાં મોતી, કિંમતી રત્નો, જરીકામ અને દેશ-વિદેશના તાજા સુગંધિત ફૂલોથી ભગવાન મહાવીર સ્વામીને આકર્ષક આંગીનો શણગાર કરાયો છે.

આ દિવ્ય આંગીએ જિનાલયની શોભા વધારી છે અને ભક્તોએ અલૌકિક સ્વરૂપના દર્શનનો લ્હાવો લીધો છે.

ભક્તોમાં ધાર્મિક ભાવના ગાઢ બનાવવા નવકાર મંત્રના જાપ, સ્નાત્ર પૂજા અને પ્રતિક્રમણ જેવા અનુષ્ઠાનો નિષ્ઠાપૂર્વક થઈ રહ્યા છે. પવિત્ર મહોત્સવથી સમગ્ર લીંબડી જૈન સંઘમાં આધ્યાત્મિક ઉલ્લાસ છવાયેલો છે.