Neelkanth Primary School | સુરેન્દ્રનગર નજીક આવેલા રતનપર સ્થિત નીલકંઠ પ્રાઇમરી સ્કૂલ ખાતે પવિત્ર શ્રાવણ મહિનાના અંતિમ સોમવારના પાવન અવસરે એક વિશેષ અને ધાર્મિક કાર્યક્રમનું આયોજન કરવામાં આવ્યું હતું.
શાળા પરિવાર દ્વારા શ્રાવણી સોમવારની ઉજવણીના ભાગરૂપે ભારતના પ્રખ્યાત ૧૨ જ્યોતિર્લિંગના અદ્ભુત અને ભવ્ય દર્શન કાર્યક્રમનું સફળ આયોજન કરાયું હતું.
આ નિમિત્તે શાળા પરિસરમાં તૈયાર કરવામાં આવેલા વિશેષ શિવલિંગ અને ૧૨ જ્યોતિર્લિંગની પ્રતિકૃતિઓના દર્શન કરીને સમગ્ર વાતાવરણ «ઓમ નમઃ શિવાય» ના નાદથી શિવમય બની ગયું હતું.
આ ધાર્મિક મહોત્સવમાં શાળાના વિદ્યાર્થીઓ, શિક્ષકો તેમજ બહોળી સંખ્યામાં વાલીઓએ હાજરી આપીને દર્શનનો લાભ લીધો હતો અને ધન્યતા અનુભવી હતી.
શાળા સંચાલકો દ્વારા જણાવવામાં આવ્યું હતું કે, બાળપણથી જ બાળકોમાં ભારતીય સંસ્કૃતિ, ધાર્મિક મુલ્યો અને આધ્યત્મિકતાના સંસ્કારોનું સિંચન થાય તેવા ઉદ્દેશ્યથી આ કાર્યક્રમનું આયોજન કરવામાં આવ્યું હતું. દર્શનાર્થે આવેલા તમામ વાલીઓ અને ગ્રામજનોએ શાળાના આ સુંદર પ્રયાસને બિરદાવ્યો હતો.
