સુરેન્દ્રનગર (Surendranagar) જિલ્લામાં ધાર્મિક સંસ્થાઓ અને સેવાના નામે લોભામણી સ્કીમ (Alluring schemes) આપી છેતરપિંડી કરવાનો વધુ એક કિસ્સો પ્રકાશમાં આવ્યો છે. મુળી તાલુકાના સાગધ્રા ગામે ગૌશાળાના લાભાર્થે યોજાયેલા એક ગેરકાયદે લકી ડ્રો (Lucky Draw) પર પોલીસે દરોડો પાડી આયોજકો સામે કાયદેસરની કાર્યવાહી હાથ ધરી છે.
થાનગઢના વિજળીયા ગામના ‘વિજળીયા વછરાજ સેવા સંગઠન’ દ્વારા વીર વછરાજ બેટની ગાયોના ઘાસચારાના બહાને આ ડ્રોનું આયોજન કરાયું હતું. આયોજકોએ રૂ. 499ની એક એવી હજારો ટિકિટો (Tickets) વેચી હતી. લોકોને આકર્ષવા માટે રૂ. 21 લાખ રોકડા, મીની ટ્રેક્ટર, કાર, સોનાના ચેન અને બુલેટ જેવા 18 જેટલા મોંઘા ઇનામો (Prizes) જાહેર કરવામાં આવ્યા હતા.
ચોક્કસ બાતમીના આધારે મુળી પોલીસની (Muli Police) ટીમ સાગધ્રા ખાતે ચાલી રહેલા ડ્રોના સ્થળે ત્રાટકી હતી. તપાસ દરમિયાન બહાર આવ્યું કે આટલા મોટા પાયે આર્થિક વ્યવહારો (Financial transactions) ધરાવતા કાર્યક્રમ માટે તંત્રની કોઈ જ પૂર્વ મંજૂરી (Permission) લેવામાં આવી નહોતી.
પોલીસે સ્થળ પરથી મનસુખ વાઢેર, અનિલ વાઢેર, જયેશ ડાભી અને શેલા વાઢેર સહિતના આયોજકોની પૂછપરછ (Interrogation) કરી હતી. કોઈપણ કાયદેસરના દસ્તાવેજો ન મળતા પોલીસે ડ્રોની પ્રક્રિયા અટકાવી દીધી હતી. બીજી તરફ, ટિકિટ ખરીદનાર સામાન્ય નાગરિકોમાં તેમના નાણાં ડૂબવાની ભીતિને પગલે ફફડાટ ફેલાયો છે. પોલીસ હાલ આ સ્કીમ (Scheme) ના નેટવર્કની ઊંડી તપાસ કરી રહી છે.
