સુરેન્દ્રનગર જિલ્લાના મૂળી તાલુકામાંથી 108 ઇમરજન્સી સેવાની પ્રશંસનીય કામગીરી સામે આવી છે. મૂળીના કળમાદ વાડી વિસ્તારમાં રહેતી 21 વર્ષીય સગર્ભા મહિલા કવિતાબેનને સવારના સમયે અચાનક પ્રસૂતિની અસહ્ય પીડા ઉપડી હતી.
પ્રથમ પ્રસૂતિ હોવાના કારણે પરિવારજનો ચિંતામાં મુકાયા હતા. અને તેમણે તાત્કાલિક 108 ઇમરજન્સી સેવાનો સંપર્ક કર્યો હતો. ફોન મળતાની સાથે જ કોંઢ 108 ની ટીમ ગણતરીની મિનિટોમાં જ ઘટનાસ્થળે પહોંચી ગઈ હતી.
એમ્બ્યુલન્સના પાયલોટ વિપુલભાઈ અને EMT સુરેશ ચૌધરીએ મહિલાની ગંભીર સ્થિતિ જોઈને હોસ્પિટલ પહોંચવાનો સમય ન હોવાનું પારખી લીધું હતું. તેમણે સમયસૂચકતા અને કુશળતા વાપરીને સવારે 5.05 કલાકે એમ્બ્યુલન્સની અંદર જ મહિલાની સફળ ડિલિવરી કરાવી હતી.
પ્રસૂતિ બાદ માતા અને નવજાત બાળક બંનેને જરૂરી પ્રાથમિક સારવાર આપવામાં આવી હતી. અને ત્યારબાદ વધુ દેખરેખ માટે સુરક્ષિત રીતે મૂળી CHC (સરકારી હોસ્પિટલ) ખાતે ખસેડાયા હતા. 108 ની ટીમની આ ત્વરિત અને સચોટ કામગીરીને કારણે માતા અને બાળક બંનેનો જીવ બચી જતા પરિવારજનોએ ટીમનો હૃદયપૂર્વક આભાર માન્યો હતો.
