સુરેન્દ્રનગરના લીંબડીની પારસનગર સોસાયટીમાં રહેતી હેતલબેન સતાણી નામની પરિણીતાએ સુરત સ્થિત પોતાના સાસરિયાઓ વિરુદ્ધ ગંભીર આક્ષેપો સાથે પોલીસ ફરિયાદ નોંધાવી છે.
હેતલબેનના લગ્ન 2004માં સુરતના રાકેશ સતાણી સાથે થયા હતા. લગ્ન બાદ પુત્રના જન્મ પછી પતિના અન્ય સ્ત્રી સાથેના આડા સંબંધો બહાર આવતા વિવાદ શરૂ થયો હતો. પરિણીતાએ વિરોધ કરતા પતિ રાકેશ, સાસુ સવિતાબેન અને પ્રેમિકા કાજલે મળીને તેને શારીરિક તેમજ માનસિક ત્રાસ આપવાનું શરૂ કર્યું હતું.
આરોપ મુજબ, સાસરિયાઓએ હેતલબેનના કરિયાવરના સોનાના દાગીના વેચી દીધા હતા અને પિયરમાંથી પણ લાખો રૂપિયા પડાવ્યા હતા. એક તબક્કે પરિણીતાને ગુજરાન ચલાવવા રોડ પર કટલેરી વેચવા મજબૂર કરી હતી.
પિયર પક્ષ પાસેથી નાણાં મંગાવી મકાન અને દુકાન લીધા બાદ પણ પતિ અને સાસુએ હેતલબેન તથા તેમના 14 વર્ષના પુત્રને ઘરમાંથી કાઢી મૂકી જાનથી મારી નાખવાની ધમકી આપી હતી. હાલ લીંબડી પોલીસે પતિ, સાસુ અને પ્રેમિકા વિરુદ્ધ ગુનો નોંધી કાયદેસરની તપાસ હાથ ધરી છે.
