PGVCL Raid | સુરેન્દ્રનગર જિલ્લામાં વીજ ચોરી ડામવા માટે PGVCL તંત્ર દ્વારા વ્યાપક સ્તરે સઘન ચેકીંગ અભિયાન હાથ ધરવામાં આવ્યું છે.
આ અંતર્ગત PGVCLની 35 અલગ-અલગ ટીમો દ્વારા વઢવાણ, ચુડા અને સાયલા તાલુકાના બલદાણા (તા.વઢવાણ), ચોરણીયા (તા.લીંબડી), ચુડા, મીણાપુર (તા. ચુડા), નડાળા (તા. સાયલા), પાણશીણા (તા.લીંબડી), સડલા (તા.મુળી) અને સાયલા સહિતના વિવિધ ગામોમાં ઓચિંતી તપાસ કરવામાં આવી હતી.
આ સ્પેશિયલ ડ્રાઈવ દરમિયાન રહેણાંક, વાણિજ્યિક અને ખેતીવાડીના મળી કુલ 748 વીજ કનેક્શનોની ચકાસણી કરવામાં આવી હતી.
જેમાંથી કુલ 93 વીજ કનેક્શનોમાં ગેરરીતિ અને વીજ ચોરી ઝડપાઈ હતી. આ ઉપરાંત વીજ જોડાણ વગર થતી ચોરીના પણ 64 કેસ બહાર આવ્યા હતા.
તંત્ર દ્વારા આ તમામ ગેરરીતિ કરનાર ઇસમો સામે સખત કાર્યવાહી કરીને કુલ 48.58 લાખ રૂપિયાનો તોતીંગ દંડ ફટકારવામાં આવ્યો છે.
PGVCLની આકસ્મિક કાર્યવાહીથી વીજ ચોરી કરતા તત્વોમાં ભારે ફફડાટ વ્યાપી ગયો છે. તંત્ર દ્વારા આગામી દિવસોમાં પણ આ પ્રકારની ડ્રાઈવ ચાલુ રાખવામાં આવશે.
