Surendranagar rain 2026 | સુરેન્દ્રનગર જિલ્લામાં લાંબા સમયના વિરામ બાદ ફરી મેઘરાજાની ધમાકેદાર એન્ટ્રી થઈ છે. સમગ્ર રાજ્યમાં વરસાદે વિરામ લીધો હતો અને છેલ્લા ઘણા સમયથી વરસાદ નહીં પડવાથી ખેડૂતો તેમજ વહીવટી તંત્રમાં ચિંતા જોવા મળતી હતી.
દરમિયાન એક સાથે 4 સિસ્ટમ સક્રિય થતા હવામાન વિભાગ દ્વારા આગામી તા. 16 સપ્ટેમ્બર સુધી ભારેથી અતિભારે વરસાદની આગાહી કરવામાં આવી છે.
હવામાનની આ આગાહીના ભાગરૂપે સુરેન્દ્રનગર જિલ્લામાં શનિવાર સાંજથી જ વાતાવરણમાં પલટો આવ્યો હતો અને ધીમીધારથી લઈને ધોધમાર વરસાદનું આગમન થયું હતું.
શનિવારે મોડી રાત્રે વઢવાણ તાલુકામાં સૌથી વધુ 1 ઈંચ અને ધ્રાંગધ્રા તાલુકામાં અડધો ઈંચ વરસાદ નોંધાયો હતો. રવિવારે સવારથી વાદળછાયું વાતાવરણ રહ્યા બાદ બપોર પછી ગાજવીજ સાથે ધોધમાર વરસાદ વરસ્યો હતો.
સુરેન્દ્રનગર, વઢવાણ શહેર તેમજ આસપાસના કટુડા, મેમકા, બાકરથળી, ખોલડિયાદ, માળોદ સહિતના ગામોમાં વરસાદ નોંધાયો છે.
આ ઉપરાંત મૂળી, થાન, ચોટીલા, લીંબડી, ચુડા અને સાયલા તાલુકામાં પણ મેઘમહેર જોવા મળી હતી.
ચાલુ વર્ષે અનિયમિત અને મોડા વરસાદને કારણે વરસાદની ઘટ જોવા મળી રહી હતી. વરસાદે વિરામ લીધાને 1 મહિનો થવા છતાં ખેડૂતો આતુરતાથી રાહ જોઈ રહ્યા હતા.
ગત તા. 13 ઓગસ્ટ 2026 પછી સંપૂર્ણ વિરામ બાદ 29 દિવસના લાંબા વિરામ પછી મેઘરાજાની પુનઃ પધરામણી થતાં ઝાલાવાડના 5,56,449 હેક્ટરમાં વાવેતર કરાયેલી મુરઝાતી મોલાતને નવજીવન મળ્યું છે અને ખેડૂતોમાં આનંદની લાગણી છવાઈ છે. લોકોએ પણ ગરમીથી રાહત અનુભવી છે.
રવિવારે સવારથી સાંજના 6 વાગ્યા સુધીના આંકડા મુજબ મૂળી તાલુકામાં 44 મીમી (2 ઈંચ), ચુડામાં 30 મીમી, સાયલામાં 11 મીમી, થાનમાં 08 મીમી, લીંબડી અને વઢવાણમાં 05 મીમી તેમજ ચોટીલા અને ધ્રાંગધ્રામાં 02 મીમી વરસાદ નોંધાયો હતો.
જિલ્લા કંટ્રોલ રૂમના અહેવાલ મુજબ આખા દિવસમાં કુલ 183 મીમી વરસાદ થયો છે અને મોસમનો કુલ સરેરાશ વરસાદ 511.7 mmએ પહોંચ્યો છે.
હવામાન વિભાગની આગાહીને પગલે સંભવિત પરિસ્થિતિને પહોંચી વળવા વહીવટી તંત્ર સંપૂર્ણ એલર્ટ અને સજ્જ બન્યું છે. ખેડૂતોમાં પાકને થયેલા ફાયદાને લઈને રાહત અને ખુશીનો માહોલ છે.
