સુરેન્દ્રનગર જિલ્લાના ચોટીલા તાલુકામાં આવેલા ધારેઈ ગામના તળાવમાંથી મોટા પાયે ગેરકાયદેસર સાદી માટીનું ખનન થતું હોવાની ફરિયાદો ઉઠી હતી.
આ બાબતને ગંભીરતાથી લઈને ચોટીલા ડેપ્યુટી કલેક્ટર એચ.ટી.મકવાણા અને તેમની ટીમે ઘટનાસ્થળે આકસ્મિક રેઇડ પાડી હતી. આ ઓપરેશન દરમિયાન તળાવમાંથી ગેરકાયદેસર માટીનું ઉત્ખનન રંગેહાથ ઝડપાઈ ગયું હતું.
તંત્રની ટીમે કડક કાર્યવાહી કરીને સ્થળ પરથી ગેરકાયદેસર રીતે માટી અને રેતીનું વહન કરતા 1 જેસીબી (JCB) અને 2 ટ્રેક્ટર ટ્રોલી કબજે કર્યા હતા. જપ્ત કરાયેલા આ તમામ વાહનો મળીને કુલ રૂ. 50 લાખનો મુદ્દામાલ ચોટીલા મામલતદાર કચેરી ખાતે ખસેડવામાં આવ્યો છે.
સરકારી જમીનમાં ગેરકાયદેસર ખનન કરવા બદલ ઝડપાયેલા વાહનોના માલિકો સામે લેન્ડ ગ્રેબિંગ અને તડીપાર સહિતના કડક કાયદાકીય પગલાં ભરવાની કાર્યવાહી હાથ ધરવામાં આવી છે.
