સુરેન્દ્રનગરના ચોટીલા ડેપ્યુટી કલેક્ટર એચ.ટી. મકવાણા અને તેમની ટીમે મોડી રાત્રે કાંધાસર અને સાંગાણી વચ્ચેના ડુંગરાળ વિસ્તારમાં દરોડા પાડી ગેરકાયદેસર ખનીજ ચોરીનો પર્દાફાશ કર્યો છે.
બાતમીના આધારે કરવામાં આવેલી આ રેઈડમાં ડુંગરોનું ખનન કરી તાસ કાઢતા 1 ડમ્પર, 1 એક્સક્વેટર મશીન અને કેરિયર સહિત કુલ રૂ. 1.50 કરોડનો મુદ્દામાલ જપ્ત કરવામાં આવ્યો છે.
આ કાર્યવાહી દરમિયાન નાના પાળીયાદના ભૂમાફિયા લાલા ભીમા જોગરાણાને સ્થળ પરથી ઝડપી લેવામાં આવ્યો હતો. તપાસ દરમિયાન એક ચોંકાવનારું ઓડિયો રેકોર્ડિંગ પણ સામે આવ્યું છે, જેમાં ઝડપાયેલ શખ્સ અન્ય વ્યક્તિને આ ગુનો પોતાના માથે લેવા અને પોલીસથી બચવા સૂચના આપી રહ્યો હતો.
પ્રશાસને આ મામલે લેન્ડ ગ્રેબિંગ અને તડીપાર સહિતની કડક કાર્યવાહી હાથ ધરી છે. મોટા પાયે થયેલી આ કાર્યવાહીથી પંથકના અન્ય ભૂમાફિયાઓમાં ભારે ફફડાટ વ્યાપી ગયો છે.
