સુરેન્દ્રનગર શહેરમાં સાયબર ક્રાઈમની એક ચોંકાવનારી ઘટના સામે આવી છે, જેમાં એક 77 વર્ષીય નિવૃત વીજ અધિકારીને નિશાન બનાવી ઠગોએ ₹10,69,500ની રકમ પડાવી લીધી છે. નવેમ્બર 2025માં પેન્શન મેળવવા માટે જરૂરી હયાતીનું પ્રમાણપત્ર (Life Certificate) જનરેટ કરવાના બહાને આ છેતરપિંડી આચરવામાં આવી હતી. ફરિયાદી વૃદ્ધને તેમના વોટ્સએપ પર એક મેસેજ મળ્યો હતો, જેમાં પંજાબ નેશનલ બેંકનો લોગો પ્રોફાઈલ પિક્ચર તરીકે રાખવામાં આવ્યો હતો, જેથી તેમને વિશ્વાસ બેઠો હતો કે આ બેંક તરફથી મળેલી સત્તાવાર સૂચના છે.
આશુતોષ નામના વ્યક્તિએ વોટ્સએપ કોલ દ્વારા વૃદ્ધ સાથે વાત કરી અને જણાવ્યું કે પેન્શન ચાલુ રાખવા માટે હયાતીનું પ્રમાણપત્ર ઓનલાઈન જનરેટ કરવું પડશે. આ માટે ઠગે એક APK ફાઈલ મોકલી હતી અને વૃદ્ધને તે ફાઈલ ડાઉનલોડ કરીને તેમાં જરૂરી વ્યક્તિગત અને બેંકિંગ વિગતો ભરવા જણાવ્યું હતું. નિવૃત કર્મચારીઓને દર વર્ષે નવેમ્બરમાં આ પ્રક્રિયા કરવાની હોવાથી, વૃદ્ધે કોઈ પણ શંકા વગર વિગતો ભરી દીધી હતી.
વિગતો સબમિટ કર્યાના થોડા જ સમયમાં, વૃદ્ધના બેંક ખાતામાંથી ટુકડે-ટુકડે મોટી રકમ ઉપડવા લાગી હતી. જેમાં બે વાર ₹5,00,000, તેમજ ₹47,500, ₹9,000 અને ₹13,000 મળીને કુલ ₹10,69,500 ગાયબ થઈ ગયા હતા. લાંબા સમય સુધી પ્રમાણપત્ર જનરેટ ન થતા અને ખાતામાંથી પૈસા ઉપડી જતા વૃદ્ધને છેતરપિંડીનો અહેસાસ થયો હતો. આ મામલે તેમણે સુરેન્દ્રનગર સાયબર ક્રાઈમ પોલીસ મથકે અજાણ્યા શખ્સો સામે ફરિયાદ નોંધાવી છે. હાલમાં સાયબર ક્રાઈમ પોલીસના PI આર.એમ. સંગાડા આ કેસની વધુ તપાસ ચલાવી રહ્યા છે અને લોકોને અજાણી લિંક કે ફાઈલ ડાઉનલોડ ન કરવા અપીલ કરી છે.
