સુરેન્દ્રનગર (Surendranagar) શહેરમાં ઉનાળાની શરૂઆત પૂર્વે જ પાણીની વિકટ સમસ્યા સર્જાતા ફિરદોષ સોસાયટીની (Firdous Society) મહિલાઓનો આક્રોશ ફાટી નીકળ્યો છે. વારંવારની રજૂઆતો છતાં તંત્ર દ્વારા કોઈ નક્કર કાર્યવાહી ન કરવામાં આવતા, આજે મોટી સંખ્યામાં મહિલાઓ પાલિકા કચેરીએ (Municipal Office) ઉમટી પડી હતી અને થાળી-વેલણ વગાડી અનોખી રીતે વિરોધ પ્રદર્શન (Protest) કર્યું હતું.
સ્થાનિક મહિલાઓએ પાલિકા કચેરીના કમ્પાઉન્ડમાં સૂત્રોચ્ચાર કરીને પોતાનો રોષ વ્યક્ત કર્યો હતો. મહિલાઓનું કહેવું છે કે સોસાયટીમાં લાંબા સમયથી પીવાના પાણીની (Drinking Water) અનિયમિતતા છે. અગાઉ પણ અનેકવાર મૌખિક અને લેખિત રજૂઆતો કરવામાં આવી છે, પરંતુ પાલિકાના અધિકારીઓ માત્ર આશ્વાસન આપી રહ્યા છે. સતત પાણીની અછતને કારણે રહીશોને મોંઘા ભાવના ટેન્કર મંગાવવાની ફરજ પડી રહી છે.
વિરોધ કરી રહેલી મહિલાઓએ જણાવ્યું હતું કે, ટૂંક સમયમાં પવિત્ર રમઝાન (Ramadan) માસ શરૂ થઈ રહ્યો છે. આ સમયે પાણીની જરૂરિયાત વધુ રહેતી હોય છે. જો સમયસર પાણીના પ્રશ્નનો નિકાલ નહીં આવે તો મુસ્લિમ બિરાદરોને ભારે હાલાકી ભોગવવી પડશે. આથી, મહિલાઓએ રમઝાન પૂર્વે જ પાણી પુરવઠો નિયમિત કરવા ઉગ્ર માંગ કરી છે.
મહિલાઓએ ચીમકી ઉચ્ચારી છે કે જો આગામી 2 થી 3 દિવસમાં પાણીની સમસ્યાનો કાયમી ઉકેલ નહીં આવે, તો તેઓ પાલિકા કચેરીએ જ ધરણા પર બેસશે અને ઉગ્ર આંદોલન (Agitation) કરશે. પાલિકાના એન્જિનિયરો અને જવાબદાર અધિકારીઓએ આ મામલે યોગ્ય તપાસ કરી તાત્કાલિક પાણી પુરવઠો પૂર્વવત કરવાની ખાતરી આપી છે.
