લીંબડીના ફૂલનાથ ટાઉનશીપમાં રહેતા અને હેલ્થ ડિપાર્ટમેન્ટમાં ફીમેલ હેલ્થ વર્કર તરીકે ફરજ બજાવતા લક્ષ્મીબેન કિરણકુમાર ચૌહાણે પોતાના સાસરી પક્ષ વિરુદ્ધ ગંભીર આક્ષેપો સાથે લીંબડી પોલીસ સ્ટેશનમાં ફરિયાદ નોંધાવી છે.
વર્ષ ૨૦૧૫માં ભોયકા ગામના કિરણકુમાર જેઠાભાઇ ચૌહાણ સાથે લગ્નગ્રંથિથી જોડાયેલા લક્ષ્મીબેનને લગ્નના થોડા સમય બાદથી જ સાસરીયાઓ દ્વારા કરિયાવર બાબતે મેણા-ટોણા મારી હેરાન કરવામાં આવતા હતા.
ફરિયાદ મુજબ, લક્ષ્મીબેનના પતિ કિરણ ચૌહાણે અન્ય સ્ત્રી સાથે આડા સંબંધ રાખી મૈત્રી કરાર કરી લીધા હતા. આ બાબતે પત્નીએ વિરોધ કરતા પતિએ ગાળો આપી, ઢીકાપાટુનો માર મારી શારીરિક અને માનસિક ત્રાસ આપવાનું શરૃ કર્યું હતું. આ ઘરકંકાસમાં સાસુ કનુબેન, સસરા જેઠાભાઈ અને જેઠ મહેન્દ્રભાઈ પણ પક્ષપાત કરી લક્ષ્મીબેનને માનસિક રીતે પીડા આપતા હોવાનું ખુલ્યું છે. પરિણીતાની ફરિયાદના આધારે લીંબડી પોલીસે ચારેય વ્યક્તિઓ વિરુદ્ધ ગુનો નોંધી કાયદેસરની કાર્યવાહી હાથ ધરી છે.
