સુરેન્દ્રનગર જિલ્લામાં માતેલા સાંઢની માફક દોડતા ડમ્પર ચાલકોનો ત્રાસ દિન પ્રતિદિન વધી રહ્યો છે. 12 December 2025ના રોજ લીંબડી સર્કલ નજીક એક બેફામ ડમ્પર ચાલકે બાઈક સવારને જોરદાર અડફેટે લીધો હતો. આ ગંભીર અકસ્માતમાં બાઈક ચાલકને લોહીલુહાણ હાલતમાં ગંભીર ઈજાઓ પહોંચી હતી.
અકસ્માત સર્જીને ડમ્પર ચાલક પોતાનું વાહન ઘટનાસ્થળે જ મૂકીને ફરાર થઈ ગયો હતો. સ્થાનિક વેપારીઓ અને અન્ય વાહન ચાલકોએ તાત્કાલિક એકઠા થઈ 108 એમ્બ્યુલન્સનો સંપર્ક કર્યો હતો અને ઈજાગ્રસ્ત યુવકને સારવાર માટે નજીકની હોસ્પિટલ ખાતે ખસેડ્યો હતો.
ઘટનાની જાણ થતા જ લીંબડી પોલીસ કાફલો સ્થળ પર દોડી આવ્યો હતો અને ફરાર ડમ્પર ચાલકની શોધખોળ હાથ ધરી કાયદેસરની કાર્યવાહી શરૂ કરી છે. સુરેન્દ્રનગરમાં દર 24 કલાકે ડમ્પર દ્વારા નાના વાહનોને હડફેટે લેવાની ઘટનાઓથી સ્થાનિકોમાં ભારે રોષ જોવા મળી રહ્યો છે.
