Chotila ACB Trap | ચોટીલા પોલીસ સ્ટેશન (Chotila Police Station) માં ફરજ બજાવતા હેડ કોન્સ્ટેબલ જયસુખભાઈ જાગાભાઈ જીડિયા (ઉંમર 30 વર્ષ) ને રાજકોટ એસીબી (Rajkot ACB) રૂ.27,000 રૂપિયાની લાંચ લેતા રંગેહાથ ઝડપી લીધા છે.
પ્રાપ્ત વિગતો અનુસાર, ફરિયાદીના ગામના કેટલાક વ્યક્તિઓ વિરુદ્ધ ચોટીલા પોલીસ સ્ટેશનમાં જુગારનો ગુનો દાખલ થયો હતો. તે ગુનામાં પકડાયેલા આરોપીઓને કોર્ટમાંથી જામીન મુક્ત કરાવવાના અવેજ પેટે આ હેડ કોન્સ્ટેબલે ફરિયાદી પાસે 27000 રૂપિયાની લાંચની માંગણી કરી હતી.
ફરિયાદી લાંચની આ રકમ આપવા જરાય માંગતા ન હોવાથી તેમણે એસીબીના ટોલ ફ્રી નંબર પર કોલ કરીને સમગ્ર મામલે ફરિયાદ નોંધાવી હતી.
ફરિયાદીની આ ફરિયાદના આધારે રાજકોટ એસીબી એકમના ફિલ્ડ પોલીસ ઇન્સ્પેક્ટર આર.કે. સોલંકીના માર્ગદર્શન હેઠળ ચોટીલા પોલીસ સ્ટેશનના કંપાઉન્ડમાં પાછળના ભાગે ડીસ્ટાફ ઓફિસના દરવાજા સામે એક ગુપ્ત છટકું ગોઠવવામાં આવ્યું હતું.
આ છટકા દરમિયાન આરોપી હેડ કોન્સ્ટેબલે ફરિયાદી પાસેથી 27000 રૂપિયાની લાંચ સ્વીકારી હતી અને એસીબીની ટીમે તરત જ તેને રંગેહાથ ઝડપી લીધો હતો. લાંચની સમગ્ર રકમ પણ સ્થળ પરથી સફળતાપૂર્વક રીકવર કરવામાં આવી છે.
હાલ રાજકોટ એસીબી દ્વારા આરોપી વિરુદ્ધ ભ્રષ્ટાચાર નિવારક અધિનિયમ હેઠળ ગુનો નોંધીને આગળની કાયદેસરની કડક કાર્યવાહી હાથ ધરવામાં આવી છે.
