સુરેન્દ્રનગર સિવિલ હોસ્પિટલના કર્મચારી સાથે દર્દીએ માથાકૂટ કરી, એકની અટકાયત

• સુરેન્દ્રનગરની સિવિલ હોસ્પિટલમાં (Civil Hospital) ફરજ પરના તબીબો અને સ્ટાફ સાથે ગેરવર્તનની ઘટનાઓમાં ચિંતાજનક વધારો થઈ રહ્યો છે.

તાજેતરમાં હોસ્પિટલની દવા બારી (Pharmacy Counter) પર ફરજ બજાવતા કર્મચારી અને દર્દી વચ્ચે દવા લેવા બાબતે ઉગ્ર બોલાચાલી થઈ હતી. સામાન્ય વાતમાંથી શરૂ થયેલો આ વિવાદ એટલો વકર્યો કે દર્દીના સગા-સ્નેહીઓએ હોસ્પિટલ દોડી આવી કર્મચારી સાથે માથાકૂટ શરૂ કરી હતી.

આ સમગ્ર મામલો સિવિલ સર્જનની (Civil Surgeon) ઓફિસમાં પહોંચ્યો હતો, જ્યાં સર્જનની હાજરીમાં જ આરોપીઓ દ્વારા અપશબ્દો બોલી હોબાળો મચાવવામાં આવ્યો હતો.

આ આખી ઘટના સીસીટીવી (CCTV) કેમેરામાં કેદ થઈ છે. હોસ્પિટલ સ્ટાફની સુરક્ષાને ધ્યાને રાખી, મોડી રાત્રે રાજ સોલંકી નામના યુવક વિરુદ્ધ સુરેન્દ્રનગર બી ડિવિઝન પોલીસ સ્ટેશનમાં (Police Station) ફરિયાદ નોંધાવવામાં આવી હતી.

પીઆઈ એચ.એચ. જાડેજાના માર્ગદર્શન હેઠળ પોલીસે સરકારી ફરજમાં રૂકાવટ (Obstruction of Duty) સહિતની કલમો હેઠળ ગુનો નોંધી આરોપી રાજ સોલંકીની અટકાયત (Arrest) કરી છે.

હાલમાં પીએસઆઈ દ્વારા આ મામલે વધુ તપાસ હાથ ધરવામાં આવી છે. વારંવાર બનતી આવી ઘટનાઓને પગલે સિવિલના કર્મચારીઓમાં રોષ અને અસુરક્ષાની લાગણી જોવા મળી રહી છે