Surendranagar jilla panchayat
સુરેન્દ્રનગર જિલ્લામાં સ્થાનિક સ્વરાજ્યની ચૂંટણીનો માહોલ ગરમાયો છે. કોંગ્રેસ અને આમ આદમી પાર્ટી (AAP) વચ્ચે ગઠબંધન ન થતા હવે ‘આપ’ એકલા હાથે ચૂંટણી મેદાનમાં ઉતરી છે. પક્ષ દ્વારા જિલ્લા પંચાયતની કુલ 32 બેઠકો પૈકી પ્રથમ તબક્કામાં 11 ઉમેદવારોના નામ જાહેર કરવામાં આવ્યા છે.
આ યાદીમાં બજાણા બેઠક પરથી ચંદ્રિકાબેન સોલંકી, ચુડાથી સુરેશભાઈ લીંબડીયા અને લખતરથી ક્ષમતાબેન મકવાણાના નામ મુખ્ય છે. આ સિવાય ગુજરવદી, ખારાઘોડા, મેમકા, સીતાપુર, સારા, સાયલા, વણોદ અને વિઠ્ઠલગઢ બેઠકો માટે પણ ઉમેદવારો જાહેર કરાયા છે.
મહત્વનું છે કે, પ્રથમ યાદીના 11 ઉમેદવારોમાંથી 05 ઉમેદવારો દસાડા વિધાનસભા વિસ્તારની બેઠકો પરથી પસંદ કરવામાં આવ્યા છે. ભાજપ, કોંગ્રેસ અને આપ વચ્ચેના ત્રિપાંખિયા જંગમાં ઉમેદવારોને પ્રચાર માટે પૂરતો સમય મળી રહે તે હેતુથી આ વહેલી જાહેરાત કરવામાં આવી છે.
બાકી રહેલી 21 બેઠકો માટેના ઉમેદવારોના નામ પણ ટૂંક સમયમાં જાહેર કરવામાં આવશે. ચૂંટણીની તારીખો જાહેર થતા જ તમામ રાજકીય પક્ષોએ એડીચોટીનું જોર લગાવવાનું શરૂ કરી દીધું છે.
