સુરેન્દ્રનગર જિલ્લાના રમતવીરોને યોગ્ય પ્લેટફોર્મ પૂરું પાડવા માટે સ્પોર્ટ્સ ઓથોરિટી ઓફ ગુજરાત દ્વારા આગામી શૈક્ષણિક વર્ષ 2025-26માં “જિલ્લા કક્ષા સ્પોર્ટ્સ સ્કૂલ” (DLSS) શરૂ કરવાનું આયોજન કરવામાં આવ્યું છે.
આ યોજના અંતર્ગત સુરેન્દ્રનગર મહાનગરપાલિકા વિસ્તારમાં આવતી અને નિયત માપદંડો પૂર્ણ કરતી શાળાઓ પાસેથી અરજીઓ મંગાવવામાં આવી છે. પસંદગી પામનાર શાળાઓએ રમતગમતના મેદાનો સાથે 200 વિદ્યાર્થીઓ માટે હોસ્ટેલ અને અદ્યતન ઇન્ડોર-આઉટડોર રમત સુવિધાઓ પૂરી પાડવાની રહેશે.
પસંદગી પ્રક્રિયામાં એવી શાળાઓને અગ્રતા આપવામાં આવશે જે ઓછામાં ઓછી 3 એકર જમીન ધરાવતી હોય અને છેલ્લા 3 વર્ષમાં બોર્ડની પરીક્ષામાં લઘુત્તમ 70 ટકા પરિણામ મેળવ્યું હોય.
રસ ધરાવતી શાળાઓએ જરૂરી આધાર-પુરાવા સાથે 08 એપ્રિલ 2026 સુધીમાં જિલ્લા રમત પ્રશિક્ષણ કેન્દ્ર, લીંબડી ખાતે અરજી કરવાની રહેશે. નોંધનીય છે કે, અગાઉ અરજી કરનાર શાળાઓએ પણ આ પ્રક્રિયા હેઠળ ફરીથી નવી અરજી કરવી ફરજિયાત છે. આ પહેલથી જિલ્લાના ઉભરતા ખેલાડીઓને અભ્યાસની સાથે રમતગમતમાં પણ પ્રોફેશનલ ટ્રેનિંગ મળી રહેશે.
