સુરેન્દ્રનગર જિલ્લામાં ગેરકાયદેસર ઇંગ્લિશ દારૂની હેરાફેરી વિરુદ્ધ લોકલ ક્રાઈમ બ્રાન્ચ (LCB) એ લાલ આંખ કરી છે. ધાંગધ્રા તાલુકાના કુડા ચોકડી પાસે હાથ ધરવામાં આવેલા પેટ્રોલિંગ દરમિયાન એક શંકાસ્પદ વેગનઆર કારને અટકાવી તલાશી લેવામાં આવી હતી.
આ તપાસ દરમિયાન કારમાંથી અલગ-અલગ બ્રાન્ડની કુલ 2448 નંગ વિદેશી દારૂની બોટલો મળી આવી હતી. પોલીસ દ્વારા દારૂના આ જથ્થાની કિંમત અંદાજે 5,32,128 રૂપિયા આંકવામાં આવી છે, જ્યારે હેરાફેરીમાં વપરાયેલી 4,00,000 રૂપિયાની કાર સહિત કુલ 9,32,128 રૂપિયાનો મુદ્દામાલ જપ્ત કરવામાં આવ્યો છે.
આ મામલે પોલીસે પાટડી તાલુકાના હિંમતપુરા ગામના રાહુલ ઉર્ફે ભૂરો રમેશભાઈ મહાલીયા તેમજ દારૂનો જથ્થો મંગાવનાર અને મોકલનાર સહિત કુલ 4 લોકો સામે ગુનો દાખલ કર્યો છે.
લોકલ ક્રાઈમ બ્રાન્ચની ટીમે બે અજાણ્યા ઇસમો અને ગાડીના માલિક વિરુદ્ધ કાયદેસરની કાર્યવાહી હાથ ધરી તપાસ તેજ કરી છે. સુરેન્દ્રનગર જિલ્લામાં દારૂબંધીના કડક અમલ માટે પોલીસ દ્વારા સતત વોચ રાખવામાં આવી રહી છે, જેના ભાગરૂપે આ મોટી સફળતા મળી છે.
