સુરેન્દ્રનગરના વઢવાણમાં મુસ્લિમ સિપાઈ સમાજ દ્વારા કોમી એકતાનું એક ઉત્કૃષ્ટ ઉદાહરણ પૂરું પાડવામાં આવ્યું છે. કડીના ખાત્રજથી પગપાળા સંઘ લઈને ચોટીલા ચામુંડા માતાજીના દર્શને જઈ રહેલા 100 થી વધુ પદયાત્રીઓ માટે વઢવાણની ગેબનશા પીર દરગાહના દ્વાર ખોલી દેવામાં આવ્યા હતા.
રસ્તામાં રહેવા કે જમવાની પૂરતી સગવડ ન હોવાથી સંઘના સંચાલકોએ મુસ્લિમ સમાજના આગેવાનોનો સંપર્ક કર્યો હતો, જેના પ્રતિસાદરૂપે સિપાઈ સમાજે દરગાહનું આખું કમ્પાઉન્ડ અને વાડી પદયાત્રીઓ માટે ખાલી કરી આપી હતી.
આ કેમ્પમાં યાત્રિકો માટે માત્ર રહેવા અને આરામની જ નહીં, પરંતુ પૌષ્ટિક ભોજન અને જરૂરી મેડિકલ સુવિધાઓ પણ નિઃશુલ્ક પૂરી પાડવામાં આવી હતી. મુસ્લિમ સમાજના આ ઉમદા કાર્યથી પ્રભાવિત થઈને પદયાત્રીઓએ તેમનો હૃદયપૂર્વક આભાર માન્યો હતો. સમાજના આગેવાનોએ નિર્ણય લીધો છે કે આગામી સમયમાં પણ ચોટીલા તરફ જતા તમામ પદયાત્રી સંઘો માટે ગેબનશા પીર દરગાહનું કેમ્પસ ખુલ્લું રહેશે.
વઢવાણના આ કિસ્સાએ સાબિત કર્યું છે કે માનવતા અને ભાઈચારો કોઈપણ ધર્મથી ઉપર છે. સોશિયલ મીડિયામાં પણ આ ભગીરથ કાર્યની સરાહના થઈ રહી છે અને ઝાલાવાડની અખંડિતતાનો સંદેશ દેશભરમાં ગુંજી રહ્યો છે.
