સુરેન્દ્રનગર એસ.ઓ.જી. (SOG) પોલીસ દ્વારા નાસતા-ફરતા આરોપીઓને ઝડપી પાડવા માટે હાથ ધરવામાં આવેલી સ્પેશિયલ ડ્રાઈવ અંતર્ગત થાન પોલીસ મથકના ગંભીર ગુનાનો ભેદ ઉકેલાયો છે. પોલીસે પોક્સો અને અપહરણના કેસમાં લાંબા સમયથી ફરાર આરોપીને ઝડપી પાડવાની સાથે હેબિયર્સ કોર્પ્સની ભોગ બનનાર સગીરાને પણ સુરક્ષિત રીતે શોધી કાઢી છે.
મળતી વિગતો અનુસાર, થાન પોલીસ મથકમાં નોંધાયેલી અપહરણ અને પોક્સોની ફરિયાદના આધારે SOGની ટીમ પેટ્રોલીંગમાં હતી. આ દરમિયાન મળેલી ચોક્કસ બાતમીને આધારે પોલીસે 26 વર્ષીય આરોપી વિપુલભાઈ બીજલભાઈ સરવૈયાને દબોચી લીધો હતો. તેની સાથે ગુમ થયેલી સગીરા પણ મળી આવતા પોલીસે બંનેનો કબજો મેળવ્યો હતો. પ્રાથમિક પૂછપરછ બાદ SOG પોલીસે આરોપી અને સગીરાને આગળની કાયદેસરની તપાસ અને કાર્યવાહી માટે થાન પોલીસ મથકે સોંપ્યા છે.
